Nuannerluinnartumik nutaarsiassaateqarpugut Siu-Tsiu-mi. ANT-fonden tapiineratigut umiatsiaq akuerisaq POCA Qaqortumut pissaaq.
Umiatsiaq pingaarutilimmik inissisimassaaq ulluinnarni sulinermi kujataani. Aalisarneq, piniarneq immami nunamilu angalanermik aammattaaq suliassaqarfinnut angallassinermi atorluarneqarumaarpoq. Kiisalu Kalaallit Nunaani naatiivilerinermut ingerlatsivik kisiartaasoq, Upernaviarsummiitoq inerisarneqaqqinnissaanut akisussaafik tigunikuuaa.
Umiatsiaq ilaatigut ilinniutitut atorneqassaaq, inuusuttut immami sullissinermut ilinniutigissavaat, immamilu isumannaallisaaneq, akisussaaffik aammalu ikioqatigiisinnaaneq. Misilittakkagut Tasiilami takutippaat immami assigiingitsunik suliaqarnermi inuusuttut kajumissusaat taavalu sulerusussusaat qaffattartoq, imminullu upperinerulernermik kinguneqarsinnaasarluni. Inuusuttut arlallit immami isumannaallisaaneq, pikkorissarnerit assigiingitsut tiguneqarsimalereerput, ilinniaqqinnissamut taavalu suliffeqarfimmut ingerlaqqinnissamut atorluarneqarsinnaalereersut.
Umiatsiaq Qaqortumut apuunissaanut, atulernissaanullu qilanaalereerpugut, ukiassalernerani tikissaaq.
ANT-fonden suliniummut piviusunngortitsineranut qujarujussuarpugut.
